jism ki qaid men huun kashmakash-e-zat men huun
ek sikke ki tarah kasa-e-ḳhairat men huun
tum se milne ke liye tum se juda hota huun
kya karun jan-e-vafa nargha-e-halat men huun
kal ka din kyon na rakhen tark-e-ta.alluq ke liye
aaj kuchh main bhi tumhari tarah jazbat men huun
kar-e-tesha bhi vahi hai mira pesha bhi vahi
main abhi daur-e-ghulami hi ke halat men huun
zarre zarre mire uTh uTh ke qadam lene lage
vadi-e-qais men kuchh aise maqamat men huun
ab miri samt koi aankh uThata bhi nahin
jab se dekha hai tujhe main bhi hijabat men huun
parda-e-sher se bole hai mira yaar ‘sana’
main hi qur.an men injil men taurat men hon
Leave a Reply