abhi badalon ka safar kahan mire mehrban
abhi qaid huun sar-e-ashiyan mire mehrban
rahe fasle miri dastaras men tamam din
magar ab to shaam ka hai saman mire mehrban
sabhi pursish-e-gham-e-jan ke vaste aae the
mire charagar mire nauha-khvan mire mehrban
vahi lafz hain durr-e-be-baha mire vaste
jinhen chhu gai ho tiri zaban mire mehrban
sabhi marhale rah-e-shauq ke the nigah men
mire hausle rahe na-tavan mire mehrban
kabhi gardish-e-shab-o-roz se na amaan mili
mire sar pe kab na tha asman mire mehrban
Leave a Reply