Koi Us Zalim Ko Samjhata Nahin

Nadir Shahjahanpuri

koi us zalim ko samjhata nahin

vo sitam karne se baaz aata nahin

dasht-e-gham men kab mira naqsh-e-qadam

har qadam pe aankh dikhlata nahin

dard-e-furqat se zaban danton men hai

kya kahun kuchh bhi kaha jaata nahin

chashm-e-dil se dekh use tu dekh le

chashm-e-zahir se nazar aata nahin

sabr-e-shauq-e-vasl-e-janan kya karun

par laga kar bhi uḌa jaata nahin

kab ḳhayal-e-zulf men har raat ko

dil pe mere saanp lahrata nahin

gul se nisbat kiya tire ruḳhsar ko

ye to vo gul hai jo kumhlata nahin

dard-e-furqat se hai ab honTon pe dam

phir bhi zalim ko taras aata nahin

jaan li hai jalva-e-ruḳhsar ne

qabr ki zulmat se ghabrata nahin

husn ki ḳhuddariyan to dekhiye

be-ḳhudi men bhi vo haath aata nahin

vo nahin aate to nadir kya gala

hosh jab do do dopahar aata nahin