Bedam Shah Warsi

Halak-e-Tegh-e-Jafa Ya Shahid-e-Naz Kare

halak-e-tegh-e-jafa ya shahid-e-naz kare

tira karam hai jise jaise sarfaraz kare

har ek zarra hai aalam ka gosh-bar-avaz

to phir kahan pe koi guftugu-e-raz kare

tajalliyan jise ghere hon tere jalve ki

vo dair-o-kaaba men kya khaak imtiyaz kare

muhal tark-e-khayal-e-najat hai lekin

vo be-niyaz jise chahe be-niyaz kare

mire karim jo be-mange tujh se paata ho

vo ja ke kyuun kahin dast-e-talab daraz kare

ye husn-o-ishq ka hai ittihad-e-yak-rangi

vahi hai marzi-e-mahmud jo ayaaz kare

banae zinda-e-javed ya rakhe ‘bedam’

mire sar ankhon pe jo kuchh nigah-e-naz kare

More Poems

Leave a Comment