M Usman Shakir
is dil ko agar tera sahara nahin milta
qismat ko koi chand sitara nahin milta
ghera hai kisi ḳhauf ne is tarah se dil ko
milta hai jo ik baar dobara nahin milta
kuchh tum bhi mohabbat men ho taqdir ke qaa.el
kuchh mujh ko bhi chalne ka ishara nahin milta
yuun Duub gaya huun tiri ankhon ke bhanvar men
ab mere safine ko kinara nahin milta
kirdar hain tabdil kahani to vahi hai
afsane men ab naam hamara nahin milta
dipak ki tarah shaam se ham jalne lage hain
is aag ka par koi sharara nahin milta
‘shakir’ tiri qismat men hain be-kar sada.en
jis shaḳhs ko bhi tu ne pukara nahin milta
Leave a Reply