main agar aap se ja.un to qarar aa jaae
par ye Darta huun ki aisa na ho yaar aa jaae
bandho ab charagaro chille ki vo bhi shayad
vasl-e-dushman ke liye su-e-mazar aa jaae
kar zara aur bhi ai josh-e-junun ḳhvar o zalil
mujh se aisa ho ki naseh ko bhi aar aa jaae
nam-e-bad-baḳhti-e-ushshaq-e-ḳhizan hai bulbul
tu agar nikle chaman se to bahar aa jaae
jiite ji ghair ko ho atish-e-dozaḳh ka azaab
gar miri naash pe vo shola-azar aa jaae
kulfat-e-hijr ko kya ro.uun tire samne main
dil jo ḳhali ho to ankhon men ghubar aa jaae
mahv-e-dildar huun kis tarah na huun dushman-e-jan
mujh pe jab naseh-e-bedard ko pyaar aa jaae
thahar ja josh-e-tapish hai to tadapna lekin
charasazon men zara dam dil-e-zar aa jaae
husn-e-anjam ka ‘momin’ mire baare hai ḳhayal
yaani kahta hai vo kafir ki tu maara jaae