Ajib Tarz-E-taKHatub Rawa Hua Ab Ke

ajiib tarz-e-taḳhātub ravā huā ab ke

ḳhulūs lahjoñ se yaksar judā huā ab ke

guzashta rut kī tarah ahd mat bhulā denā

pukārtā hai ye kamra sajā huā ab ke

hameñ to yaad bahut aayā mausam-e-gul meñ

vo surḳh phuul sā chehra khilā huā ab ke

Thahar, Thahar ke guzartā hai zard mausam bhī

hameñ to jiinā bhī jaise sazā huā ab ke

na phuul mahke na sabza ugā na barf girī

tumhārā kahnā hī yaaro bajā huā ab ke

Leave a Comment