meer-taqi-meer

Aao Kabhu To Pas Hamare Bhi Naz Se

aao kabhu to paas hamare bhi naaz se

karna suluk khuub hai ahl-e-niyaz se

phirte ho kya darakhton ke saae men duur duur

kar lo muvafaqat kisu be-barg-o-saz se

hijran men us ke zindagi karna bhala na tha

kotahi jo na hove ye umr-e-daraz se

manind-e-subha uqde na dil ke kabhu khule

ji apna kyuun ki uchte na roze namaz se

karta hai chhed chhed hamara jigar tamam

vo dekhna tira mizha-e-nim-baz se

dil par ho ikhtiyar to hargiz na kariye ishq

parhez kariye is maraz-e-jan-gudaz se

aage bichha ke nata ko laate the tegh o tasht

karte the yaani khuun to ik imtiyaz se

maane hon kyuun ki girya-e-khunin ke ishq men

hai rabt-e-khas chashm ko ifsha-e-raz se

shayad sharab-khane men shab ko rahe the ‘mir’

khele tha ek mughbacha mohr-e-namaz se

More Poems

Leave a Comment