Aankhon Ko Kuchh KHwab Dikha Kar Manenge

āñkhoñ ko kuchh ḳhvāb dikhā kar māneñge

aap hamāre hosh uḌā kar māneñge

lagtā hai ye paanī bechne vaale log

har bastī meñ aag lagā kar māneñge

tujh ko chhūne kī chāhat meñ dīvāne

shāyad apne haath jalā kar māneñge

tai to ye thā pichhlī bāteñ bhūlnī haiñ

aap magar sab yaad dilā kar māneñge

ghar kā jhagḌā gar bāhar aa jā.egā

bāhar vaale andar aa kar māneñge

chāhe phir āvāz chalī jaa.e lekin

ham us ko āvāz lagā kar māneñge

ghar pakkā karne kī bāteñ karte haiñ

ya.anī vo dīvār uThā kar māneñge

Leave a Comment