Shmashad Shad
har taraf udasi hai hausle bhi zaḳhmi hain
dil-lagi ke mausam men qahqahe bhi zaḳhmi hain
vahshaton ke pairon men kaun bandhe zanjiren
kya karen kahan jaa.en faisle bhi zaḳhmi hain
be-haya.i ke saa.e ghalib aa ga.e ham par
aj-kal tamaddun ke zaviye bhi zaḳhmi hain
rah-o-rasm ka qaa.il ab nahin raha insan
hain lahu lahu rishte rabte bhi zaḳhmi hain
kimiya.i faslon ke baa.is ab ghizaon se
gum hui ghiza.iyyat za.iqe bhi zaḳhmi hain
ab kahan nikalte hain hasil-e-ghazal ash.ar
chiḳhti radifen hain qafiye bhi zaḳhmi hain
be-gharaz nahin jaata ab koi ayadat ko
ab to gham-gusari ke mashghale bhi zaḳhmi hain
al-gharaz pahunchna hai agahi ki manzil par
hasraten hain pazhmurda raste bhi zaḳhmi hain
‘shad’ kis tarah apna ilm banTen auron ko
nutq-o-lab muqaffal hain falsafe bhi zaḳhmi hain
Leave a Reply