jo zaḳhmon se apne bahalte rahenge
vahi phuul hain shahd ugalte rahenge
ghaTa.en uThin saanp viraniyon ke
inhi astinon men palte rahenge
shari.at ḳhas-o-ḳhar hi ki chalegi
alam rang-o-bu ke nikalte rahenge
na.i bastiyan roz basti rahengi
jinhen mere sahra nigalte rahenge
machalte rahen raushni ke patange
diye mere kajal ugalte rahenge
ravan har taraf zauq-e-pasti rahega
bulandi ke chashme ubalte rahenge
jise saans lena ho ḳhud aaḌ kar le
ye jhonke hua ke to chalte rahenge
ye patte to ab phuul kya ho sakenge
magar umr bhar haath malte rahenge
‘muhib’ rasti hai ibarat kaji se
mire bal kahan tak nikalte rahenge
Leave a Reply