junun hai zehn men to hausle talash karo
misal-e-ab-e-ravan raste talash karo
ye iztirab ragon men bahut zaruri hai
uTho safar ke na.e silsile talash karo
ye sar-zamin safar ke liye bahut kam hai
chalo ufaq pe na.e marhale talash karo
jo thak ga.e ho ye bosida zindagi ji kar
to zindagi ke alag zaviye talash karo
jo chahte ho ki aḳhbar chal paḌe apna
to surḳhiyon ke liye hadse talash karo
ye tang-zauq adibon se ḳhush nahin honge
musha.ere ke liye masḳhare talash karo
ḳhuda pe chhoḌ do ye kal koi paḌhe na paḌhe
na.i ghazal ke liye qafiye talash karo
Leave a Reply