duniya bhi pesh aai bahut be-ruḳhi ke saath
ham ne bhi zaḳhm khaae baḌi sadgi ke saath
ik musht-e-ḳhak aag ka dariya lahu ki lahr
kya kya rivayaten hain yahan aadmi ke saath
apnon ki chahaton ne bhi kya kya diye fareb
rote rahe lipaT ke har ik ajnabi ke saath
jangal ki dhuup chhanv hi jangal ka husn hai
sayon ko bhi qubul karo raushni ke saath
tum raste ki gard na ho jaao to kaho
do-char gaam chal ke to dekho kisi ke saath
koi dhuan uTha na koi raushni hui
jalti rahi hayat baḌi ḳhamushi ke saath