Saghar Siddiqui
ḳhata-var-e-muravvat ho na marhun-e-karam ho ja
masarrat sar jhuka.egi parastar-e-alam ho ja
inhi be-rabt ḳhvabon se koi ta.abir niklegi
inhi uljhi hui rahon pe mera ham-qadam ho ja
kisi zardar se jins-e-tabassum mangne vaale
kisi bekas ke lashe par sharik-e-chashm-e-nam ho ja
kisi din in andheron men charaghan ho hi ja.ega
jala kar dagh-e-dil koi ziya-e-sham-e-gham ho ja
tujhe suljha.ega ab inqilab-e-vaqt ka shana
taqaza-e-junun hai gesu-e-dauran ka ḳham ho ja
tajassus markaz-e-taqdir ka qaa.il nahin hota
shu.ur-e-bandagi! begana-e-dair-o-haram ho ja
ye manzil aur gard-e-karvan ‘saghar’ kahan apne
simaT kar rahguzar-e-vaqt par naqsh-e-qadam ho ja
Leave a Reply