Anjum Saleemi
khincha hua hai gardish-e-aflak ne mujhe
ḳhud se nahin utarne diya chaak ne mujhe
mauj-e-hava men tairta phirta tha main kahin
phir yuun hua ki khinch liya ḳhaak ne mujhe
main raushni men aa ke pasheman bahut hua
uryan kiya hai ishq ki poshak ne mujhe
a.ine ki tarah tha main shaffaf o ab-dar
gadla diya hai chashm-e-havas-nak ne mujhe
ḳhushbu sa main ghilaf ke andar muqim tha
aur kho diya hai sina-e-sad-chak ne mujhe
apne siva jahan men koi sujhta nahin
la phenka hai kahan mire idrak ne mujhe
Leave a Reply