Ho Lene Do Barish Hum Bhi Ro Lenge

ho lene do bārish ham bhī ro leñge

dil meñ haiñ kuchh zaḳhm purāne dho leñge

merā is bāzār meñ jaanā hai be-sūd

merī anā ko vo sikkoñ se tauleñge

jaate haiñ sab apnī apnī Tolī meñ

apnā kaun hai saath kisī ke ho leñge

us ko shāyad yaad hamārī aa.egī

havā chalegī aur parinde Doleñge

sab chīḳhe chillā.e kyā paḌtā hai farq

be-his patthar kabhī nahīñ kuchh boleñge

ḳhud hī samundar ḳhud hī dariyā Dar kaisā

jab chāheñge ḳhud ko ḳhud meñ samo leñge

dil kī dhaḌkan baḌhī hai sunñe vāloñ kī

kis ne ḳhabar uḌā dī ham kuchh boleñge

Leave a Comment