Poet
ho lene do barish ham bhi ro lenge
dil men hain kuchh zaḳhm purane dho lenge
mera is bazar men jaana hai be-sud
meri ana ko vo sikkon se taulenge
jaate hain sab apni apni Toli men
apna kaun hai saath kisi ke ho lenge
us ko shayad yaad hamari aa.egi
hava chalegi aur parinde Dolenge
sab chiḳhe chilla.e kya paḌta hai farq
be-his patthar kabhi nahin kuchh bolenge
ḳhud hi samundar ḳhud hi dariya Dar kaisa
jab chahenge ḳhud ko ḳhud men samo lenge
dil ki dhaḌkan baḌhi hai sunne valon ki
kis ne ḳhabar uḌa di ham kuchh bolenge
Leave a Reply