jo miri pusht men paivast hai us tiir ko dekh
kitni ḳhush-rang nazar aati hai tasvir ko dekh
raqs karta hua maqtal men chala aaya huun
paanv mat dekh mire paanv ki zanjir ko dekh
koi neza mire siine men alam hota hai
miri shah-e-rag pe chamakti hui shamshir ko dekh
ḳhud ko ijad main karta huun na.e tarz pe roz
ai miri jaan kabhi tu miri ta.amir ko dekh
meri ankhon men kisi ḳhvab ne dam toḌ diya
meri palkon se ulajhti hui ta.abir ko dekh
kya hai duniya ke ḳharabat men vahshat ke siva
mujh men abad mire shahr-e-asatir ko dekh
itni ujlat thi ki main ḳhud ko vahin chhoḌ aaya
kaun deta hai sada kucha-e-taḳhir ko dekh
mire alfaz ki duniya ki kabhi sair to kar
ham se kuchh ḳhak-nashinon ki bhi jagir ko dekh
dekh ‘shahid’ ko samajhna koi asan nahin
itna dushvar nahin huun miri tahrir ko dekh
Leave a Reply