Dard-E-Dil Mein Kami Na Ho Jae

dard-e-dil men kami na ho jaae

dosti dushmani na ho jaae

tum miri dosti ka dam na bharo

asman muddai na ho jaae

baithta hai hamesha rindon men

kahin zahid vali na ho jaae

tal-e-bad vahan bhi saath na de

maut bhi zindagi na ho jaae

apni khu-e-vafa se Darta huun

ashiqi bandagi na ho jaae

kahin ‘bekhud’ tumhari khuddari

dushman-e-be-khudi na ho jaae

Leave a Comment