Akasr Apne Dar-Pae-Azar Ho Jate Hain Hum

akasr apne dar-pae-azar ho jaate hain ham

sochte hain is qadar bimar ho jaate hain ham

muztarib thahre so shab men der se aati hai niind

subh se pahle magar bedar ho jaate hain ham

naam ki khvahish hamen karti hai sargarm-e-amal

is amal se bhi magar bezar ho jaate hain ham

jhuta vaada bhi agar karti hai malne ka khushi

vaqt se pahle bahut tayyar ho jaate hain ham

bhuul kar vo bakhsh de gar raushni ki ik kiran

daimi shohrat ke daavedar ho jaate hain ham

mutmain hona bhi apne be-khabar hone se hai

be-sukun hote hain jab hushiyar ho jaate hain ham

ik zara si baat aur phir ashk thamte hi nahin

lahr si ik dil men aur sarshar ho jaate hain ham

Leave a Comment