ba-tarz-e-ḳhva sajani paḌi hai aḳhir-kar
na.i zamin banani paḌi hai aḳhir-kar
tapish ne jis ki mujhe kimiya banana tha
mujhe vo aag bujhani paḌi hai aḳhir-kar
bahut dinon se ye miTTi paḌi thi ek jagah
har ek samt uḌani paḌi hai aḳhir-kar
jahan pe qasr bana.e ga.e the kaghaz ke
vahan se raakh uThani paḌi hai aḳhir-kar
vo paanv bhige hue dekhne ki ḳhvahish men
chaman men os bichhani paḌi hai aḳhir-kar
mire badan ki ziya baḌh ga.i thi suraj se
lahu men raat milani paḌi hai aḳhir-kar
zamin pe daagh bahut paḌ ga.e the ḳhuun ke daagh
falak ko barf girani paḌi hai aḳhir-kar
Leave a Reply