Ata Abidi
jagte hi nazar aḳhbar men kho jaati hai
zindagi dard ke ambar men kho jaati hai
na-ḳhuda aql ke patvar uThata hai ki jab
kashti-e-dil miri manjdhar men kho jaati hai
be-sabab sochne vaale kabhi socha tu ne
agahi kasrat-e-afkar men kho jaati hai
uḌte rahte hain ḳhayalat ke jugnu phir bhi
baat kyuun parda-e-iz.har men kho jaati hai
us ke kamon ka hai rangin ḳhushamad pe madar
aur mehnat miri isar men kho jaati hai
hurmat-e-parda zaruri hai ‘ata-ji’ varna
chiiz jaisi bhi ho bazar men kho jaati hai
Leave a Reply