bhale hi mira hausla past hota
muqabil to koi zabardast hota
guzara to pahle bhi karta hi tha main
maza jab tha bilkul tahi-dast hota
tiri dast-giri kahan aur kahan main
tira aasra hi sar-e-dast hota
main phuTa tha jis shaḳh par ban ke konpal
usi shaḳh men kaash paivast hota
gilass ek tha piine vaale ka.i the
to kya muntaqil dast-dar-dast hota
kahin ham ko be-daḳhl kar de na koi
nahin ham se ghar ka dar-o-bast hota
tumhi ho jo laa.e ho mujh ko yahan tak
na tum niich hote na main past hota
kaha tu ne maana na afsos apna!
bulandi pe ‘rashid’ ba-yak-jast hota
Leave a Reply