Amir Ameer
tiri hi shakl ke but hain ka.i tarashe hue
na puchh ka.aba-e-dil men bhi kya tamashe hue
hamari laash ko maidan-e-ishq men pahchan
bujhi hui si hain ankhen to dil ḳharashe hue
ba-vaqt-e-vasl koi baat bhi na ki ham ne
zaban thi sukhi hui honT irti.ashe hue
vo kaise baat ko tolenge aur bolenge
jo pal men tole hue aur pal men mashe hue
mazaq chhoḌ bata ye ki mujh se kya parda
tire nuqush hain saare mire talashe hue
main tere shahr se nikla tha ain us lamha
tire nikah pe taqsim jab batashe hue
Leave a Reply