Yashab Tamanna
aisa bhi nahin dard ne vahshat nahin ki hai
is gham ki kabhi ham ne isha.at nahin ki hai
jab vasl hua us se to sarshar hue hain
aur hijr ke mausam ne ri.ayat nahin ki hai
jo tu ne diya us men izafa hi hua hai
is dard ki daulat men ḳhayanat nahin ki hai
ham ne bhi abhi khol ke rakkha nahin dil ko
tu ne bhi kabhi khul ke vazahat nahin ki hai
is shahr-e-badan ke bhi ajab hote hain manzar
lagta hai abhi tum ne siyahat nahin ki hai
is arz-e-tamanna men kise chain mila hai
dil ne magar is ḳhauf se hijrat nahin ki hai
ye dil ke ujaḌne ki alamat na ho koi
milne pe ghaḌi-bhar ko bhi hairat nahin ki hai
Leave a Reply