Maula Kisi Ko Aisa Muqaddar Na Dijiyo

Jawad Sheikh

maula kisi ko aisa muqaddar na dijiyo

dilbar nahin to phir koi digar na dijiyo

apne saval sahl na lagne lagen use

aate bhi hon javab to far-far na dijiyo

chadar vo dijiyo use jis par shikan na aa.e

jis par shikan na aa.e vo bistar na dijiyo

aa.e na kar-e-shukr-guzari pe koi harf

jab dijiyo to zarf se baḌh kar na dijiyo

bikhrao kuchh nahin bhi simaTte mire aziiz

apne kisi ḳhayal ko paikar na dijiyo

tafriq rahne dijiyo tarif-o-tanz men

ab ke sharab zahr mila kar na dijiyo

ya dil se tark kijiyo dastar ka ḳhayal

ya us muamle men kabhi sar na dijiyo

kahiyo ki tu ne ḳhuub bana.i hai ka.enat

lekin use likha.i ke number na dijiyo

me.aar se siva yahan raftar chahiye

‘javvad’ us ko aḳhiri over na dijiyo