rang aur ruup men sone se khari hoti hai
dil ki vo rag jo mohabbat se bhari hoti hai
ashiyane ko panapne nahin deti duniya
barq gir paḌti hai jab shaḳh hari hoti hai
jhenp jaata hai chaTakti hui kaliyon ka shabab
mast ankhon men agar niind bhari hoti hai
ashk barsati hui aati hai gulshan men bahar
phuul khilte hain to shabnam ki tari hoti hai
arsh-o-kursi-o-falak dair-o-haram ka.aba-e-dil
phir bhi mahdud tiri jalvagari hoti hai
kahkashan dekhti hai us ki tajalli ka nikhar
jis ki angḌa.i men jadu-asari hoti hai
din ko gar dhuup ki chadar men sukun milta hai
raat ab ḳhatm charagh-e-sahari hoti hai
yaad aa jaati hai ḳhud apni nikharti tauba
jaam men jab mai-e-ḳhush-rang bhari hoti hai
chahe lafzon men kahe chahe isharon se kahe
‘fazl’ jo baat bhi kahta hai khari hoti hai
Leave a Reply