karen hijrat to ḳhak-e-shahr bhi juz-dan men rakh len
chalen ghar se to ghar kya yaad bhi saman men rakh len
hamara kya ki gul ko noch kar takrim bhi de den
sahife men saja den ya kisi gul-dan men rakh len
ziyan-e-dil hi is bazar men sud-e-mohabbat hai
yahan hai fa.eda ḳhud ko agar nuqsan men rakh len
bahut tarsi hai duniya tere hashr-e-ru-numa.i ko
bata ab ye talab ham aur kis imkan men rakh len
hamara kufr ye hai harf aata ho jahan tujh par
hamin to hain jo teri aabru iman men rakh len
amaan ki ek hi surat hai ab is be-yaqini men
parind-e-ghar! ham bhi jaan teri jaan men rakh len
Dhale jab tak na shab ham kaaḌh kar ik sham.a ki lau se
tulu-e-sub.h ka manzar na raushan-dan men rakh len?
Leave a Reply