Poet
ajab hi Dhang se ab anjuman-ara.i hoti hai
jahan par bhi rahen ham saath men tanha.i hoti hai
fatuhat-e-dil-o-jan par yuun mat itra mire lashkar
ki is maidan men fil-faur hi paspa.i hoti hai
ye mela vaqt ka hai haath us ke haath men rakhna
bichhaḌ jaa.en yahan to phir kahan yakja.i hoti hai
ham aise kuchh bhi kar len un ki tah ko pa nahin sakte
amir-e-shahr ki baton men vo gahra.i hoti hai
salasat se bayan ahval-e-dil karna hai ik ḳhubi
basa-auqat chup rahna bhi to dana.i hoti hai
zaban-e-ḳhalq goya.i ke gauhar to luTati hai
labon par jo nahin aati vahi sachcha.i hoti hai
Leave a Reply