tumhen shab-e-vaada dard-e-sar tha ye sab hain be-e’tibar baten
yaqin na aaega ham ko hargiz banao go tum hazar baten
nahin jo manzur tum ko milna to kyuun nahin saaf saaf kahte
samajh men aati nahin hamare karo na tum pechdar baten
uthi hai kaali ghata falak par hai saqi-e-mah-vash baghal men
bahak bahak kar hain kya maze se bana rahe bada-khvar baten
huiin hain jis din se chaar ankhen tumhari ai yaar ‘mashriqi’ se
yahi tamanna hai baith kar tum suno hamari do-char baten
hai aai mushkil se vasl ki shab ki jis ki muddat se thi tamanna
jo main ne shikve kiye the us ki karo na tum baar baar baten
ye kya mahal hai ki aaj karte ho shaikh ji zikr-e-zohd-o-taqva
yahi hai vajib ki hon gul-o-mul ki vaqt-e-fasl-e-bahar baten
jo aaj aae ho mere ghar par to hai ye zikr-e-raqib kaisa
na kijiye ‘mashriqi’ se sahab ki hain ye sab nagavar baten