Shuja Khaavar
tabhi aa.egi labon par mire dil ki baat khul ke
miri zaat se mile jab tiri ka.enat khul ke
mira ishq hai bas itna ki jaga.en koi fitna
tire honT band ho ke miri ḳhvahishat khul ke
mujhe bandh kar jinhon ne sar-e-taq rakh diya hai
kabhi ḳhud bayan karunga main vo sab nikat khul ke
ye jo aaj basta basta sa adu ke raḳht men hai
yahi gul-badan mila tha kabhi puuri raat khul ke
baḌi be-maza guzari hai zamana-saziyon ne
na adavaten nibha.in na ta.alluqat khul ke
Leave a Reply