ḳhizan ke jaane se ho ya bahar aane se
chaman men phuul khilenge kisi bahane se
vo dekhta rahe muḌ muḌ ke su-e-dar kab tak
jo karvaTen bhi badalta nahin Thikane se
ugal na sang-e-malamat ḳhuda se Dar naseh
milega kya tujhe shishon ke TuuT jaane se
zamana aap ka hai aur aap us ke hain
laḌa.i mol len ham muft kyuun zamane se
ḳhuda ka shukr savere hi aa gaya qasid
main bach gaya shab-e-furqat ke naaz uThane se
main kuchh kahun na kahun kah rahi hai ḳhak-e-jabin
ki is jabin ko hai nisbat ik astane se
qayamat aa.e qayamat se main nahin Darta
uTha to de koi parda kisi bahane se
ḳhabar bhi hai tujhe a.ina dekhne vaale
kahan gaya hai dupaTTa sarak ke shane se
ye zindagi bhi koi zindagi hui ‘bismil’
na ro sake na kabhi hans sake Thikane se
Leave a Reply