zamin par raushni hi raushni hai
ḳhala men ik kiran gum ho ga.i hai
main tanha ja raha huun su-e-manzil
ye parchha.in kahan se aa rahi hai
ye shaam aur raushni ki ye qataren
udasi aur gahri ho ga.i hai
uruj-e-mah hai aur maqbaron par
abad ki chandni chaTki hui hai
ubhar ai mauj-e-tufan-ḳhez mujh ko
ye kashti ret men Duubi hui hai
hava se hai kali jumban sar-e-shaḳh
ye kin hathon men neze ki ani hai
gira hai shaḳh-e-gul se ek pata
kisi ne kya mujhe avaz di hai
Leave a Reply