mira nahin to vo apna hi kuchh ḳhayal kare
use kaho ki ta.alluq ko phir bahal kare
nigah-e-yar na ho to nikhar nahin paata
koi jamal ki jitni bhi dekh-bhal kare
mile to itni ri.ayat ata kare mujh ko
mire javab ko sun kar koi saval kare
kalam kar ki mire lafz ko suhulat ho
tira sukut miri guftugu muhal kare
bulandiyon pe kahan tak tujhe talash karun
har ek saans pe umr-e-ravan zaval kare
vo honT hon ki tabassum sukut ho ki suḳhan
tira jamal har ik rang men kamal kare
main us ka phuul huun ‘nayyar’ so us pe chhoḌ diya
vo gesuon men saja.e ki pa.emal kare
Leave a Reply