gila nahin jo vo begana-var guzre hain
ham aise ahl-e-suḳhan be-shumar guzre hain
taras na khaao miri shiddat-e-tabahi par
ki umr bhar yahi lail-o-nahar guzre hain
tamam-umr raha ḳhauf-e-na-pazira.i
jidhar se guzre hain divana-var guzre hain
hamin se tazkira-e-qahat-e-ashiqan tauba
hamin to kal tire kuche se yaar guzre hain
rahin-e-vaz-e-buzurgan hai apna dil ya.ani
tire hi shahr men tujh se hazar guzre hain
hamara naam bhi rakhiye fasana-ḳhvanon men
ki ham bhi apne savaneh-nigar guzre hain
ham apne josh-e-tamanna men bhuul baiThe the
ki ham se aur bhi ummid-var guzre hain
is anjuman men tujhe kaun puchhta ‘ali’
hazar tujh se gharib-ud-dayar guzre hain
Leave a Reply