chhupe hue the jo dil men vo Dar purane the
ki raste the na.e ham-safar purane the
main uḌ raha tha faza men ik ehtiyat ke saath
mujhe ḳhabar thi mire bal-o-par purane the
tamam-shahr na.i raushni men tha malbus
magar gharon ke sabhi bam-o-dar purane the
mujhe talash hamesha na.e charaghon ki thi
ki asmanon ke shams-o-qamar purane the
thi jin ki lau se dayar-e-suḳhan men tabani
vo taaq taaq charagh-e-hunar purane the
Leave a Reply