vaqt ne dil ki tabi.at men vafa rakkhi hai
kulfat-e-agahi phir us ki saza rakhi hai
dil ho pazhmurda to hai ḳhanda-e-gul be-ma.ani
har ḳhushi aur ghami dil ne chhupa rakkhi hai
chaak karti hai saba sub.h ko ghunchon ke jigar
ye kahani mujhe shabnam ne suna rakkhi hai
ghunche ghunche men hai poshida salib-e-gham-e-dost
kis ne phulon men ye qatil ki ada rakkhi hai
kis ke chhup jaane se hairan hui hai duniya
kis ke jalvon ne ye divani bana rakkhi hai
zindagi ho ga.i kis tarah tu itni sasti
kis liye tu ne bhari duniya sata rakkhi hai
ilm se jis ke mujhe mil sake manzil ka nishan
vaqt ne mujh se vahi baat chhupa rakkhi hai
ham ne har moḌ pe chahat ke jala.e hain charagh
ham ne har gaam pe ulfat ki bina rakkhi hai
tafraqon ka nahin aapas men kahin koi javaz
sab ne auham ki divar uTha rakkhi hai
dard-e-hijran ke tasalsul se na ghabra dil-e-zar
ishq ne dard ke andar hi dava rakkhi hai
vaqt le aaya hai ḳhud had men use der saver
jis ne bhi qad se siva apni ana rakkhi hai
us sitamgar ka men ai ‘raz’ karun kya shikva
har bala mere liye jis ne rava rakkhi hai
Leave a Reply