saqiya ye jo tujh ko ghere hain
in men kuchh rind kuchh luTere hain
apni tahzib kha rahi hai hamen
saanp ke munh men ḳhud sapere hain
jis ne baḳhshe hain phuul gulshan ko
us ne kuchh ḳhaar bhi bikhere hain
kal jo tufan tha samundar men
us ke ab sahilon pe Dere hain
tere baare men kuchh nahin ma.alum
ham agar hain to sirf tere hain
hosh-o-ghaflat men paas hi maujud
mujh ko vo har taraf se ghere hain
tum se to kya nazar mila.enge
ḳhud se bhi ham nigah phere hain
dar-haqiqat vahi adu hain ‘falak’
jin ko kahta hai tu ki mere hain
Leave a Reply