koi dhun ho main tire giit hi gaae jaun
dard siine men uthe shor machae jaun
khvab ban kar tu barasta rahe shabnam shabnam
aur bas main isi mausam men nahae jaun
tere hi rang utarte chale jaaen mujh men
khud ko likkhun tiri tasvir banae jaun
jis ko milna nahin phir us se mohabbat kaisi
sochta jaun magar dil men basae jaun
ab tu us ki hui jis pe mujhe pyaar aata hai
zindagi aa tujhe siine se lagae jaun
yahi chehre mire hone ki gavahi denge
har nae harf men jaan apni samae jaun
jaan to chiiz hai kya rishta-e-jan se aage
koi avaz diye jaae main aae jaun
shayad is raah pe kuchh aur bhi raahi aaen
dhuup men chalta rahun saae bichhae jaun
ahl-e-dil honge to samjhenge sukhan ko mere
bazm men aa hi gaya huun to sunae jaun
Leave a Reply