koi taara na dikha shaam ki virani men
yaad aaega bahut be-sar-o-samani men
dam-ba-khud rah gaya vo pursish-e-halat ke baad
aaina ho gai main alam-e-hairani men
dil salamat rahe tufan se tasadum men magar
haath se chhut gaya haath pareshani men
sahl karti main takhatub men mukarna tujh se
mushkilen aur thiin is raah ki asani men
ab tiri yaad jo aae bhi to yuun aati hai
jaise kaghaz ki koi naav chale paani men
aise aalam men miri niind ka aaseb na puchh
khvab mange hain tiri chashm ki nigarani men
khinch rakhti hai mire mire paanv ko dahliz talak
koi zanjir hai is ghar ki nigahbani men