ain-tabish

Bazm Khaali Nahin Mehman Nikal Aate Hain

bazm ḳhali nahin mehman nikal aate hain

kuchh to afsane miri jaan nikal aate hain

roz ik marg ka aalam bhi guzarta hai yahan

roz jiine ke bhi saman nikal aate hain

sochta huun par-e-parvaz sameTun lekin

kitne bhule hue paiman nikal aate hain

yaad ke soe hue qafile jaag uThte hain

ḳhvab ke kuchh nae unvan nikal aate hain

baiThna chahti hai thak ke jo vahshat apni

kitne hi dasht-o-bayaban nikal aate hain

isti.are hain jo ankhon se chhalak paḌte hain

kitne hi ashk ke divan nikal aate hain

ik zara chain bhi lete nahin ‘tabish’-sahab

mulk-e-gham se nae farman nikal aate hain

More Poems

Leave a Comment