Adil Mansuri
duur ufuq ke paar se avaz ke parvardigar
sadiyon soi khamushi ko samne aa kar pukar
jaane kin hathon ne khela raat sahil par shikar
sher ki avaz ko tarsa kiye suune kachhar
khvab ke sukhe hue khakon men lazzat ka ghubar
niind ke dimak-zada gatte ke pichhe intizar
tirgi kaise mitegi teri nusrat ke baghair
asman ki sidhiyon se nuqrai faujen utaar
akhir-e-shab sab sitare so rahe hain be-khabar
koi suraj ko khabar kar do ki ab shab-khun maar
phailta jaata hai kirnon ka sunahri jaal phir
jagmaga utthi hain shamshiren qatar-andar-qatar
jaane kis ko dhundne dakhil hua hai jism men
haddiyon men rasta karta hua piila bukhar
jism ki mitti na le jaae baha kar saath men
dil ki gahrai men girta khvahishon ka abshar
Leave a Reply