Samina Saqib
badan ke khet ko ab sinchna hai
jo boya tha vo aḳhir kaTna hai
tiri avaz ko main chhu rahi huun
tira lahja mujhe ab dekhna hai
main ik mazdur ki beTi huun pagle
mujhe ḳhvabon ka rasta rokna hai
mujhe chhup kar kahin rona hai pahle
phir apni maan se hansna bolna hai
mohabbat ke nirale za.iqe hain
isi patthar ko har pal chaTna hai
main vo chiḌiya huun jis ko umr saari
isi pinjre men uḌna sikhna hai
main ḳhud apni rukavaT huun ‘samina’
mujhe ḳhud rasta bhi DhunDhna hai
Leave a Reply