Hafeez Banarasi
bhagte sayon ke pichhe ta-ba-kai dauḌa karen
zindagi tu hi bata kab tak tira pichha karen
ru-e-gul ho chehra-e-mahtab ho ya husn-e-dost
har chamakti chiiz ko kuchh duur se dekha karen
be-niyazi ḳhud sarapa iltija ban ja.egi
aap apni dastan men husn to paida karen
dil ki tha ḳhush-fahm agah-e-haqiqat ho gaya
shukr bhejen ya tiri bedad ka shikva karen
mughbachon se mohtasib tak saikḌon darbar hain
ek saghar ke liye kis kis ko ham sajda karen
tishnagi had se baḌhi hai mashghala koi nahin
shisha-o-saghar na toḌen bada-kash to kya karen
dusron par tabsira farmane se pahle ‘hafiz’
apne daman ki taraf bhi ik nazar dekha karen
Leave a Reply