Khwaja Shauq
chhupa.e kya koi dard-e-jigar ko
mohabbat rang deti hai nazar ko
tumhara husn tum par kab khila tha
dua.en do mere zauq-e-nazar ko
payam-e-ahl-e-dil kya jaane koi
nazar vaale samajhte hain nazar ko
buland itna to ho zauq-e-tamasha
nigah-e-husn ḳhud DhunDe nazar ko
zara ruk ruk ke har parda uThana
kahin jalve na gum kar den nazar ko
salamat inqilabat-e-zamana
na.i rahen milin fikr-o-nazar ko
jahan hoti hai dil ko raah dil se
nazar pahchan leti hai nazar ko
nazar de to shu.ur-e-did bhi de
nahin to kya karun le kar nazar ko
tajalli ḳhud nazar banti hai lekin
miTa kar etibarat-e-nazar ko
unhen dekhe mujassam diid ho kar
shu.ur itna kahan hai har nazar ko
ḳhayal un ka jahan bhi ‘shauq’ aaya
nazar tai kar ga.i hadd-e-nazar ko
Leave a Reply