Tilok Chand Mahroom
ba.is-e-imbisat ho amad-e-nau-bahar kya
rang-e-chaman dikha.ega sina-e-dagh-dar kya
gumbad-e-gard-bad hai sar-ba-falak har ik taraf
dasht-e-junun men rah ga.i qais ki yadgar kya
talḳh hai ziist kijiye kis liye talḳh-tar ise
ḳhurrami-e-guzishta ko roiye baar baar kya
sham-e-visal se ho kya mahv-e-fareb-e-arzu
yaad nahin rahi hamen sub.h-e-vida-e-yar kya
aap hi miT-miTa ke ham ḳhak-e-rah-e-fana hue
aur miTa.egi hamen gardish-e-rozgar kya
Leave a Reply