Wali Alam Shaheen
shahr-e-ḳhuban se jo ham ab bhi guzar aate hain
kitne dhundla.e hue naqsh ubhar aate hain
raat ja chhupti hai sunsan jaziron men kahin
raat ke ḳhvab miri ruuh men dar aate hain
sehr-andaz hai kya nim-nigahi teri
ek se kafir-o-din-dar nazar aate hain
kis ko sach kahiyega kis ruup ko jhuTla.iyega
aa.ine men to ka.i aks utar aate hain
ek muddat se hain is shahr men ham avara
bam-o-dar aaj bhi anjan nazar aate hain
vo bulate to hain ‘shahin’ sar-e-bam magar
ham hi kuchh soch ke zinon se utar aate hain
Leave a Reply