agarche tujh se bahut ikhtilaf bhi na hua
magar ye dil tiri janib se saaf bhi na hua
taalluqat ke barzakh men hi rakha mujh ko
vo mere haq men na tha aur khilaf bhi na hua
ajab tha jurm-e-mohabbat ki jis pe dil ne mire
saza bhi paai nahin aur muaaf bhi na hua
malamaton men kahan saans le sakenge vo log
ki jin se ku-e-jafa ka tavaf bhi na hua
ajab nahin hai ki dil par jami mili kaai
bahut dinon se to ye hauz saaf bhi na hua
hava-e-dahr hamen kis liye bujhati hai
hamen to tujh se kabhi ikhtilaf bhi na hua
Leave a Reply