Salim Saleem
na chhin le kahin tanha.i Dar sa rahta hai
mire makan men vo divar-o-dar sa rahta hai
kabhi kabhi to ubharti hai chiḳh si koi
kahin kahin mire andar khanDar sa rahta hai
vo asman ho ki parchha.in ho ki tera ḳhayal
koi to hai jo mira ham-safar sa rahta hai
main joḌ joḌ ke jis ko zamana karta huun
vo mujh men TuuTa hua lamha bhar sa rahta hai
zara sa nikle to ye shahr ulaT palaT jaa.e
vo apne ghar men bahut be-zarar sa rahta hai
bula raha tha vo dariya ke paar se ik din
jabhi se paanv men mere bhanvar sa rahta hai
na jaane kaisi girani uTha.e phirta huun
na jaane kya mire kandhe pe sar sa rahta hai
chalo ‘salim’ zara kuchh ilaj-e-jan kar len
yahin kahin pe koi chara-gar sa rahta hai
Leave a Reply