rutba-e-taḳht se mahrum hai mansab mera
sahab-e-fahm samajhte nahin matlab mera
hai mire sher se ahval-e-zamana zahir
paḌh lo tum bhi ki ye shisha hai mahaddab mera
meri basti ko ujale men dikha kar mujh ko
qatl karta hai koi ḳhvab men har shab mera
tarjuman hain mire mahaul ki ghazlen meri
ye alag baat ki lahja hai mohazzab mera
shahr-e-qazi tire fatvon se gharaz kya mujh ko
rab mira dil mira marzi miri maz.hab mera
khushbu-e-sher se mahzuz hua kar ‘rahat’
gham ke bimar ye nusḳha hai mujarrab mera
Leave a Reply