ye kaun muskurahaton ka karvan liye hue
shabab-e-sher-o-rang-o-nur ka dhuan liye hue
dhuan ki barq-e-husn ka mahakta shoala hai koi
chatili zindagi ki shadmaniyan liye hue
labon se pankhudi gulab ki hayat mange hai
kanval si aankh sau nigah-e-mehrban liye hue
qadam qadam pe de uthi hai lau zamin-e-rah-guzar
ada ada men be-shumar bijliyan liye hue
nikalte baithte dinon ki ahaten nigah men
rasile hont fasl-e-gul ki dastan liye hue
khutut-e-rukh men jalva-gar vafa ke naqsh sar-ba-sar
dil-e-ghani men kul hisab-e-dostan liye hue
vo muskurati ankhen jin men raqs karti hai bahar
shafaq ki gul ki bijliyon ki shokhiyan liye hue
ada-e-husn barq-pash shola-zan nazara-soz
faza-e-husn uudi uudi bijliyan liye hue
jagane vaale naghma-e-sahar labon pe maujzan
nigahen niind laane vaali loriyan liye hue
vo nargis-e-siyah-e-nim-baz, mai-kada-ba-dosh
hazar mast raton ki javaniyan liye hue
taghaful-o-khumar aur be-khudi ki ot men
nigahen ik jahan ki hoshiyariyan liye hue
hari-bhari ragon men vo chahakta bolta lahu
vo sochta hua badan khud ik jahan liye hue
za-farq ta-qadam tamam chehra jism-e-naznin
latif jagmagahaton ka karvan liye hue
tabassumash takallume takallumash tarannume
nafas nafas men thartharata saz-e-jan liye hue
jabin-e-nur jis pe pad rahi hai narm chhut si
khud apni jagmagahton ki kahkashan liye hue
”sitara-bar o mah-chakan o khur-fishan” jamal-e-yar
jahan-e-nur karvan-ba-karvan liye hue
vo zulf-e-kham-ba-kham shamim-e-mast se dhuan dhuan
vo rukh chaman chaman bahar-e-javedan liye hue
ba-masti-e-jamal-e-kaenat, khvab-e-kaenat
ba-gardish-e-nigah daur-e-asman liye hue
ye kaun aa gaya mire qarib uzv uzv men
javaniyan, javaniyon ki andhiyan liye hue
ye kaun aankh pad rahi hai mujh par itne pyaar se
vo bhuli si vo yaad si kahaniyan liye hue
ye kis ki mahki mahki sansen taaza kar gaiin dimagh
shabon ke raaz nur-e-mah ki narmiyan liye hue
ye kin nigahon ne mire gale men bahen daal diin
jahan bhar ke dukh se dard se amaan liye hue
nigah-e-yar de gai mujhe sukun-e-be-karan
vo be-kahi vafaon ki gavahiyan liye hue
mujhe jaga raha hai maut ki ghunudgi se kaun
nigahon men suhag-rat ka saman liye hue
miri fasurda aur bujhi hui jabin ko chhu liya
ye kis nigah ki kiran ne saz-e-jan liye hue
sute se chehre par hayat rasmasati muskurati
na jaane kab ke ansuon ki dastan liye hue
tabassum-e-sahar hai aspatal ki udaas shaam
ye kaun aa gaya nashat-e-be-karan liye hue
tire na aane tak agarche mehrban tha ik jahan
main ro ke rah gaya huun sau gham-e-nihan liye hue
zamin muskura uthi ye shaam jagmaga uthi
bahar lahlha uthi shamim-e-jan liye hue
faza-e-aspatal hai ki rang-o-bu ki karvaten
tire jamal-e-lala-gun ki dastan liye hue
‘firaq’ aaj pichhli raat kyuun na mar rahun ki ab
hayat aisi shamen hogi phir kahan liye hue
(2)
magar nahin kuchh aur maslahat thi us ke aane men
jamal-o-did-e-yar the naya jahan liye hue
isi nae jahan men aadmi banenge aadmi
jabin pe shahkar-e-dahr ka nishan liye hue
isi nae jahan men aadmi banenge devta
taharaton ka farq-e-pak par nishan liye hue
khudai aadmi ki hogi is nae jahan par
sitaron ke hain dil ye pesh-goiyan liye hue
sulagte dil sharar-fishan o shoala-bar barq-pash
guzarte din hayat-e-nau ki surkhiyan liye hue
tamam qaul aur qasam nigah-e-naz-e-yar thi
tulu-e-zindagi-e-nau ki dastan liye hue
naya janam hua mira ki zindagi nai mili
jiyunga sham-e-did ki nishaniyan liye hue
na dekha aankh utha ke ahd-e-nau ke parda-daron ne
guzar gaya zamana yad-e-raftagan liye hue
ham inqilabiyon ne ye jahan bacha liya magar
abhi hai ik jahan vo bad-gumaniyan liye hue
(3)
nae zamane men agar udaas khud ko paunga
ye shaam yaad kar ke apne gham ko bhuul jaunga
ayadat-e-habib se vo aaj zindagi mili
khushi bhi chaunk chauk uthi gham ki aankh khul gai
agarche doctor ne mujh ko maut se bacha liya
par is ke baad us nigah ne mujhe jila liya
nigah-e-yar tujh se apni manzilen main paunga
tujhe jo bhuul jaunga to raah bhuul jaunga
(4)
qarib-tar main ho chala huun dukh ki kaenat se
main ajnabi nahin raha hayat se mamat se
vo dukh sahe ki mujh pe khul gaya hai dard-e-kaenat
hai apne ansuon se mujh pe aina gham-e-hayat
ye be-qusur jan-dar dard jhelte hue
ye khak-o-khun ke putle apni jaan pe khelte hue
vo ziist ki karah jis se be-qarar hai faza
vo zindagi ki aah jis se kaanp uthti hai faza
kafan hai ansuon ka dukh ki maari kaenat par
hayat kya inhen haqiqaton se hona be-khabar
jo aankh jagti rahi hai aadmi ki maut par
vo abr-e-rang-rang ko bhi dekhti hai sada-tar
sikha gaya dukh mira purani piir janna
nigah-e-yar thi jahan bhi aaj meri rahnuma
yahi nahin ki mujh ko aaj zindagi nai mili
haqiqat-e-hayat mujh pe sau tarah se khul gai
gavah hai ye shaam aur nigah-e-yar hai gavah
khayal-e-maut ko main apne dil men ab na dunga raah
jiyunga haan jiyunga ai nigah-e-ashna-e-yar
sada suhag zindagi hai aur jahan sada-bahar
(5)
abhi to kitne na-shunida naghma-e-hayat hain
abhi nihan dilon se kitne raz-e-kaenat hain
abhi to zindagi ke na-chashida ras hain saikdon
abhi to haath men ham ahl-e-gham ke jas hain saikdon
abhi vo le rahi hain meri shaeri men karvaten
abhi chamakne vaali hai chhupi hui haqiqaten
abhi to bahr-o-bar pe so rahi hain meri vo sadaen
samet luun unhen to phir vo kaenat ko jagaen
abhi to ruuh ban ke zarre zarre men samaunga
abhi to subh ban ke main ufuq pe thartharaunga
abhi to meri shaeri haqiqaten lutaegi
abhi miri sada-e-dard ik jahan pe chhaegi
abhi to aadmi asir-e-dam hai ghulam hai
abhi to zindagi sad-inqalab ka payam hai
abhi tamam zakhm o daagh hai tamaddun-e-jahan
abhi rukh-e-bashar pe hain bahmiyat ki jhaiyan
abhi mashiyyaton pe fath pa nahin saka bashar
abhi muqaddaron ko bas men la nahin saka bashar
abhi to is dukhi jahan men maut hi ka daur hai
abhi to jis ko zindagi kahen vo chiiz aur hai
abhi to khuun thokti hai zindagi bahar men
abhi to rone ki sada hai naghma-e-sitar men
abhi to udti hain rukh-e-bahar par havaiyan
abhi to didani hain har chaman ki be-fazaiyan
abhi faza-e-dahr legi karvaton pe karvaten
abhi to soti hain havaon ki vo sansanahaten
ki jis ko sunte hi hukumaton ke rang-e-rukh uden
chapeten jin ki sarkashon ki gardanen marod den
abhi to sina-e-bashar men sote hain vo zalzale
ki jin ke jagte hi maut ka bhi dil dahal uthe
abhi to batn-e-ghaib men hai is saval ka javab
khuda-e-khair-o-shar bhi la nahin saka tha jis ki taab
abhi to god men hain devtaon ki vo mah-o-sal
jo denge badh ke barq-e-tur se hayat ko jalal
abhi rag-e-jahan men zindagi machalne vaali hai
abhi hayat ki nai sharab dhalne vaali hai
abhi chhuri sitam ki duub kar uchhalne vaali hai
abhi to hasrat ik jahan ki nikalne vaali hai
abhi ghan-garaj sunai degi inqalab ki
abhi to gosh-bar-sada hai bazm aftab ki
abhi to punji-vad ko jahan se mitana hai
abhi to samrajon ko saza-e-maut paana hai
abhi to daant pisti hai maut shahryaron ki
abhi to khuun utar raha hai aankhon men sitaron ki
abhi to ishtirakiyat ke jhande gadne vaale hain
abhi to jad se kisht-o-khun ke nazm ukhadne vaale hain
abhi kisan-o-kamgar raaj hone vaala hai
abhi bahut jahan men kam-kaj hone vaala hai
magar abhi to zindagi musibaton ka naam hai
abhi to niind maut ki mire liye haram hai
ye sab payam ik nigah men vo aankh de gai
ba-yak-nazar kahan kahan mujhe vo aankh le gai
Leave a Reply